Marta o'qildi
"Асрлар қадарли чўзилган кеча..". Мухтор Комил (1960 -2016) шеърлари.
Юракнинг бир банди узилган кеча,
Асрлар қадарли чўзилган кеча,
Чимилдиқ ичида сенинг ўрнингда
Ўзга бир келинчак сузилган кеча,
Йиғладим, йиғладим, йиғладим..
Такдирму бошимда ўйнаган қамчи,
Сочингми армоним учган арғамчи.
Чорлагандай бўлар кимдир олисдан,
Наҳотки сенмисан ўшал алдамчи.
Билмадим, билмадим, билмадим.…!
Бошимни боғлашди, боғландим, жоним,
Қалбимни доғлашди, доғландим жоним,
Сенинг ҳузурингга бормоқчи бўлиб,
Неча бор чоғландим, чоғландим, жоним,
Бормадим, бормадим, бормадим..
* * *
Маҳзун бир қушга айлансам,
Учиб кетсам, учиб кетсам.
Ширин бир тушга айлансам,
Сўнг ёдингдан ўчиб кетсам.
Маҳзун маҳзун нидо қилсам.
Маҳзун қушлар қаторида
Кета кетгунча йўлларда
Кўз ёшимни ичиб кетсам.
Тиконлар ичра хор ётсам,
Уйғонсам гулнинг ёдида.
Ногоҳ булбуллигим англаб
Фиғон қилсам, чўчиб кетсам.
Хаёл ёлғон муҳаббат рост,
Менинг чеккан азобим рост,
Ўзимни сенда топдимку
Наҳот сендан кечиб кетсам...
2.jpg)
***
Лаболаб ишқ шаробин ич,
Қониб кетгил, қониб кетгил.
Қоронғу кунларингдан кеч,
Яна рўшноланиб кетгил.
Яна ойна қилиб ойни,
Оламга очгил чиройни,
Яна кўнглим каби жойни
Бузиб мендан тониб кетгил.
Хаёлотнинг жиловин ол,
Муҳаббатнинг яловин ол,
Кел, эй, қалбим оловин ол,
Ёниб кетгил, ёниб кетгил!.
Шоир шеърларини хофизлар Охунжон Маъдалиев ва Абдурашид Исҳоқовлар ижро этган.
июль 2017 йил
- - -